१० दिनपछि त्रिशूली–३ ए को सुरुङबाट दुई जनाको जीवितै उद्धार
उद्धार टोलीप्रति तमु समाज यूकेको उच्च सम्मान!
लन्डन, ४ सेप्टेम्बर २०२६। भोटेकोशीमा आएको विनाशकारी बाढीका कारण त्रिशूली–३ “ए” जलविद्युत् आयोजनाको सुरुङभित्र फसेका दुई कर्मचारीलाई १० दिनपछि जीवितै उद्धार गरिएको छ।
शुक्रबार बिहान नेपाली सेनाको नेतृत्वमा खटिएको संयुक्त उद्धार टोलीले आयोजनाका मेकानिकल फोरम्यान सञ्जय साह र मेकानिकल सुपरभाइजर कबिर महर्जनलाई सुरुङबाट सकुशल बाहिर निकालेको हो। उद्धारपछि दुवै जनालाई आवश्यक स्वास्थ्य परीक्षण तथा उपचारका लागि काठमाडौँ लगिएको छ।
बाहिरी संसारसँग सम्पर्कविहीन भएर सुरुङको अँध्यारो र अत्यन्तै कठिन वातावरणमा १० दिन बिताएका उनीहरूको जीवितै उद्धार हुनुलाई अदम्य साहस, धैर्य र आशाको अनुपम उदाहरणका रूपमा लिइएको छ। यस सफल उद्धारले सुरुङभित्र अझै फसेका हुन सक्ने अन्य व्यक्तिका परिवार तथा शुभेच्छुकमा नयाँ आशा जगाएको छ। सुरुङभित्र थप व्यक्तिहरू रहेको आशङ्कामा खोज तथा उद्धार कार्य जारी रहेको जनाइएको छ।
उद्धार गरिएका साहले सुरुङभित्र अन्य व्यक्तिहरू पनि रहेको जानकारी उद्धारकर्मीलाई दिएको समाचार सार्वजनिक भएको छ। यद्यपि, उनीहरूको यकिन सङ्ख्या र अवस्थाबारे सम्बन्धित निकायबाट आधिकारिक विवरण आउन बाँकी रहेकाले अपुष्ट विवरणलाई अन्तिम तथ्यका रूपमा लिन नमिल्ने देखिन्छ।
यस साहसिक र मानवीय उद्धार कार्यमा नेपाली सेना, नेपाल प्रहरी, सशस्त्र प्रहरी बल, प्राविधिक तथा विशेषज्ञ टोली, स्वास्थ्यकर्मी, स्थानीय समुदाय र प्रत्यक्ष–अप्रत्यक्ष रूपमा सहयोग गर्ने सम्पूर्ण पक्षले पुर्याएको योगदानप्रति तमु समाज यूकेले हार्दिक आभार व्यक्त गर्दै उच्च सम्मान प्रकट गरेको छ।
समाजले भनेको छ, “अत्यन्त प्रतिकूल परिस्थितिमा पनि आशा, साहस र सामूहिक प्रयासलाई जीवित राख्न सके असम्भवजस्तो देखिएको कार्य पनि सम्भव बनाउन सकिन्छ भन्ने सन्देश यस सफल उद्धारले पुनः प्रमाणित गरेको छ।
तमु समाज यूकेले जीवितै उद्धार गरिएका सञ्जय साह र कबिर महर्जनको शीघ्र तथा पूर्ण स्वास्थ्यलाभको कामना गर्दै सुरुङभित्र फसेका हुन सक्ने अन्य व्यक्तिहरूको पनि सकुशल उद्धार होस् भन्ने कामना गरेको छ। साथै, आफ्नो ज्यानको परवाह नगरी निरन्तर खोज तथा उद्धारमा खटिएका सम्पूर्ण उद्धारकर्मीप्रति समाजले सम्मानसहित सलाम अर्पण गरेको छ।
शिब कुमार गुरुङ
लन्डन
